İnsan Payızın son günləri idi. Bayırda
soyuq, dumanlı hava vardı. Pəncərəyə yaxınlaşıb həyətə baxdım. Tutqun təbiət ürəyimi
üşütdü. Düşüncələrimi, duyğularımı işıqlandıracaq, ruhumu oxşayacaq Günəş axtardım.
Təbiətin ruhunu duymaq mənimçün xoş idi. Son günlər o ruhu daxilimdə
yaşatdığımı hiss edirdim. Yüksəklikdə ona çatmaq üçün İnsan psixologiyasını
araşdırmaq istəyirdim. Məqsədimə qəlbimin nurunu və enerjimi kainatdakı
sonsuzluğa təslim etməklə çata biləcəyimi düşünürdüm və bununçün İnsan
psixologiyasının tədqiqi edəcək proqram da hazırlamışdım. İşə ölməklə başlamalıydım. Doğmalarıma
xaricə gedəcəyimi bildirib laboratoriyaya gəldim. Qapıları kilidləyib "həyat”
adlandırdığım aparatın altında oturdum. Bir neçə saniyədən sonra aparat şüşə örtüklə
ətrafdan tədric olunaraq qapalı sistem yaratdı. Vaxt keçdikcə bədənimin
süstləşdiyini, gözlərimin qapandığını hiss etdim. Nə qədər ki, şüurumu
itirməmişdim monitoru izlədim. Kompyuter arzularıma uyğun işləyir,
düşüncələrimi əks etdirirdi. Sadəcə arzulamaqla müxtəlif
saytlara baxır, qlobal şəbəkələrdəki profillərimdə statuslar yazırdım. Xatırladığım
son statusum belə idi. "Zamanımı suallarıma xərcləyirəm. Cavablarımdan yeni
suallar doğur. Son vaxtlar isə həyatın zaman və məkan daxilində mövcudluğuna
inanmaq istəyirdim. Lakin, İnternet və virtual aləm fikirlərimi qarışdırdı. Düşüdüm
ki, virtuallıqda zaman məkansız irəliləyirsə, varolma nisbidir.” Zaman keçdikcə hiss etdim ki,
ruhum cismimdən ayrılaraq virtual aləmdə doğulur. Burada ilk rastlaşdığım sevgilim
oldu. Yeni dünyamda hamıdan gizli yaşamaq istəyirdim. Onu isə qəlbim arzulamış,
ruhum tapmışdı. Həyat mənimçün qeyri-adi idi.
Təbiəti duyur, hadisələrin gizli tərəflərini görür, fikirləri oxuyurdum. Kədərliydi.
Ətrafımdakı hər şeyi öyrənmək istəyi isə ömrümü yeyirdi. Nəhayət, nəticəsiz
axtarışlardan sonra yaxın sandığım İnsanı-Təbiətin ən böyük möcüzəsini
araşdırmaq qərarına gəldim. Uzun tədqiqatlardan sonra müəyyənləşdirdim ki İnsanı
reallıqda öyrənmək mümkün deyil. Bu yerdə nədənsə uşaqkən
nənəmdən eşitdiyim sözlər yadıma düşdü. Babam evə sarsılmış vəziyyətdə
gəlmişdi. - Dost sandığım adamlar qanıma
susayıblar. - dedi. – Təəssüf, tanımamışam... Nənəm nə olduğunu soruşmadan televiziyanın
yanına getdi. - Bu bir möcüzədi. İnsan hazırlayıb.
– dedi. - Nə olsun ki! - İnsan bundan dəfələrlə artıq
möcüzəli və sirli olmalıdır ki belə iş görsün. Üzülmə! Hafizəmdə həkk olunan bu sözlər
hər məğlubiyyətimdə mənə təsəlli olur, ruhdan düşməyə qoymurdu. Virtual aləmdə
məkanın nisbiliyini gördükdə burada doğulmaq şüurlara yol tapmaq fikrinə düşdüm.
Proqramlaşdırdığım "Həyat” aparatının köməyilə həyatdan
ayrılaraq virtual aləmdə yaşadım, şüurlara nüfuz edtdim. Düşüncələrin rəngarəngliyinə
baxmayaraq insanların daxili dünyası ağ və qara rənglərin vəhdətindən ibarət
idi. Dəyişkən rənglər sanki, xeyirlə
şərin mübarizəsini əks etdirirdi. İşığa tərəf getsəm də çox vaxt kölğədə
qalırdım. Bir gün yaranışı məhv edəcək gücə malik əjdaha peyda olduğunu
eşitdim. Virtual dünyada, ruhlar, düşüncələr aləmində əjdaha nə gəzir deyə
fikirləşdim. Lakin, maraq güc gəldi. Mübarizəyə hazırlaşan gücləri izlədim.
Güclər əjdahayabənzər qara qüvvəylə döyüşdülər. Bəzilərini əjdaha uddu. Bəziləri
isə əjdahanı uddu. Əjdahanın udduğu düşüncələr yox olurdu. Bu qaranlıqda işığın
sönməsinə bənzəyirdi. Ruh qalib gəldikdə isə düşmən qara tüstüyə çevrilib itir.
Az keçməmiş isə qalib özü daha böyük əjdahaya çevrilirdi. Anbaan böyüyən şərdən
qorxub qaçmaq istədim. Qaranlığa qərq oldum. Hər şeyin sonu çatdığını
fikirləşdim. Axı mən həyatım bahasına burada idim. Məğlubiyyətim ölümüm demək
idi. - Oğul, oğul! Ayıl, bala! Mənə
yazığın gəlsin! – Anamın səsi idi. Qəlbim parçalandı. - Anacan! Narahat olma! – deyə
bildim. Ətrafı tüstü bürüdü. Bu əjdaha
idi. Can verirdi. Uzaqdan doğmalarımın surətini gördüm. Anam məni qucaqlayıb
ağlayır, sevgilim onu sakitləşdirməyə çalışırdı. Baxışlarımız rastlaşdı. Qışqırmaq
istədi. Sus işarəsi verdim. İşi yekunlaşdırmaq lazım idi. Yaratdığım proqramı
və oraya əlavə etdiyim məlumatları mən virtuallıqdan ayrılmadan ləğv etmək
lazım idi. Əks halda həyatdakı əjdahaların silahı olacaqdı. Düşdüyüm vəziyyətdə
özünü məhvetmə sonum ola bilərdi. O bunu bildiyindən ağladı. Qəlbim titrədi. - Bağışla, əzizim! - deyib
gözlərimi yumdum. Ona inanırdım. İstəyimi yerinə yetirəcəyinə əmin idim. Ayılanda onu yanımda-proqramlaşdırdığım
aparatın altında gördüm. - Nə etmisən! – Qışqırdım. - Heç... – Yavaş-yavaş özünə
gəldi. – Unutmamısansa, mən də proqramçıyam. – Gülümsədi. Qorxudan dilim söz tutmurdu. - Nə ixtiyarla işlərimə
qarışmısan! – Qızardı, dinmədi. – Səni itirsəm necə yaşayardım! Heç məni
fikirləşmirsən! Astadan: - Onu özündən soruş! – dedi. Soruşmadım. Cavabsız suallarımı
artırmaq istəmirdim. Günahkarcasına doğmalarıma baxdım. Anamın əllərindən, nəmli
gözlərindən öpdüm. Onun oxşamaları, əzizlərimin sevgi dolu baxışları qəlbimə
sevic bəxş etdi, düşüncələrimi saflaşdırdı. Gözəl duyğularıma görə Allahıma
təşəkkür etdim. "Əjdaha”ya daxilimdəki sevgi ilə qalib gəldiyimi anladım.
Tanrıdan yaratdıqlarına sevgi dolu bir ürək bəxş etməsini dilədim.