Evimiz dörd yol ayrıcında
yerləşırdi. Meşəyə gedən yol əks istiqamətdən kəndimizin içərilərinə doğru
uzanaraq rayonla şəhəri birləşdirən yolları kəsirdi. Uşaqlıqda mənə elə gəlirdı
bütün yollar evimizin yanından keçir. Sonsuz görünən yollara baxaraq xəyallara
dalırdım.
Anamsa:
- Can balam, yollara bu qədər baxma! – deyirdi. – Yollar səni aparar!
Hərdən anamın mənə baxaraq için-için
ağladığını hiss edirdim.
Bir dəfə atama:
- Uşağın fikri yollardadır. – söylədi. - Yollar balamı aparacaq!
- Bu hardan çıxdı. – Atam
hirsləndi.
- Sənə deməmişəm, onun köbəyini
quşlar aparıb. Balam uçub gedəcək.
- Yaxşı, bəsdi! İndi hansı
zamandır ki sən belə şeylərə inanırsan?
- Taleyimizi Tanri yazir, zaman
yox...
İllər ötdü. Tale yolumu
daşlı-kəsəkli yollardan saldı. Reallıqda keçdiyim bütün yollarımın röyalarımda
evimizin başına dolandığını gördüm.
Nəhayət, vətənimdən ayrılacağım
gun yetişdi. Keçəcəyim yolun
ata ocağına aparacağın görmək istəyi ilə yatdım. Səhəri başım dumanlı ayıldım.
Yuxularımı xatırlamırdım.
Anamı xəyal edib:
- Niyə məndən küsmüsünüz! – deyərək yenidən yuxuladım.
- Oğul, bizi atırsan!
- Qayıdacağam, anacan...
- Sağlıq olsun! – Anamın səsi
titrədi. Urəyim parçalandı. Onu qucaqlayıb qəlbimin sızıltısına doyunca ağlamaq
istədim. Lakin o, daş kimi ağırlaşıb yerimdən tərpənməyə imkan vermədi.
Astadan:
- Qəlbim, səni daşımaq çox çətindir! – dedim.
Səbirlə işin sonunu gözləyən atam
əsəbi dilləndi.
- A bala, burada işləyə
bilmirsən. Xaricə getmək haradan çıxdı. Bəs o, necə olacaq?
Susdum...
Metrodakı hadisəni xatırladım.
Sıxlıq idi.
- Qolumdan tut! - dedim.
Kədərli idi. Qızarmış gözlərini
gizlətməyə çalışıb başını aşağı saldı.
- Narahat olma! Yıxılası yer yoxdu.
Xəyala daldığından harada
olduğumuzdan xəbərsiz idi. Növbəti stansiyada qolundan tutub birtəhər basabasdan
çıxdım. Lakin, düşərkən yanımda çaşqın-çaşqın mənə baxan qocanın tənəsini
eşitdim.
- Sağ ol, a bala! Məni hara çəkirsən?
Geri qayıtmaq istədim. Qapılar
bağlandı. O vaxt yollarımızın bir gün beləcə ayrılacağını fikirləşib ondan
uzaqlaşmağa çalışdım.
- Oğul, ayıl! Soyuq olar...
- Haradasız, anacan! – Yuxulu
cavab verdim. - Niyə bu gecə xəyal yolum evimizdən keçmədi?
- Xəyallarına qurban olum, bala!
Qərib yollar vətəndən keçməz!
Məni soyuq tər basdı. Bu vaxt saat
zəng çaldı. Ayıldım. Getməliydim.
- Reallıq budur! – söyləyib məni yoldan saxlayacaq bir möcüzəyə ümid
edərək hazırlaşmağa başladım.